#اسكريبت #البنات_ألطف_الكائنات #فاطيما_يوسف

فاق من سرحانه في بناته نبض قلبه وبص لها بإبتسامة وقال:
_ ولا حاجة حبيبتي هكون سرحان في مين يعني وأنا معايا النجوم والقمر والنور ده كله ،
وبص علي بناته بضحكة وغمزة وكملوا الطريق شوية يذكروا ربنا وشوية يغنوا وشوية يضحكوا ويهزروا مع بعض في جو كله مودة ورحمة وس\كينة من إللي قال لنا عليها ربنا سبحانه وتعالى ،

وشوية ورجع سرح مع نفسه تاني وحمد ربنا اداله الزوجة الصالحة والذرية الحسنة والرزق الواسع وقال في نفسه:
_ اللهم لك الحمد كما أكرمتني ورزقتني فاللهم الستر لباقي عمري أنا وحباييي يارب ،

وكملوا الطريق على كده وخلاص وصلت عاليا وبناتها لبيت أبوها إللي أول ما شافته إبتسمت براحة علشان هتشوف أبوها وأمها وتقعد معاهم يومين بحالهم ،

دخلت عليهم وخبطت علي الباب بشغب وفتحولها الباب وانصدموا من الفرحة لما شافوها ومصدقوش نفسهم أنها جت هيا وبناتها أخيراً بعد شهور الدراسة ماخلصت ،
دخلت عاليا هيا وولادها وبعد السلامات دخلت البنات في أوضة مخصصة ليهم مجهزاها والدتها دايما لأحفادها وروح قلبها  إللي بتشتاق لشوفتهم علطول ونفسها مايفارقوهاش ابدا ،

قضت عاليا معاها اليومين كاملين كلهم بهجة وضحك مع اخواتها بدون حد مايجرحها ولا يضايقها ولا يحسسها بالنقص إنها مخلفتش الصبيان وبدون ماحد يضغط عليها تحمل تاني وتخلف للمرة الخامسة علشان تجيب الواد إللي في وجهة نظرهم إللي مخلفتش الواد تبقي مخلفتش ولا جابت السند إللي يسندها هيا وجوزها بعد أرذل العمر وكأن البنات مبشيلوش أهاليهم في كبرهم ، وكأن البنات لما يتجوزوا خلاص كأنهم اتباعوا ومش هيشفوفهم إلا كل سنة مرة والواد إللي هيفضل تحت رجليهم ومش هيفارقهم أبدا ،

وفضلت سرحانة في كل إللي جرحوها وأذوها وخلوها كل يوم تنام معيطة وكأن بإيديها هيا إللي تخلق الواد والبت وافتكرت سلفتها لما كل شوية تقول لها المثل إللي يوجع قلبها “يامخلفة البنات ياشايلة الهم للممات” وأثناء ماهي سرحانة دخلت والدتها عليها وقالت لها بمحايلة:
_ أقعدي كمان يوم واحد ياعاليا ياغاليا ملحقتش أشبع منك ولا من البنات وأنتي بتيجي كل تلت شهور مرة ،

راحت عاليا عليها وحضنتها بحب وقالت لها بس كدة يانور عيني ده إنتي تؤمري ، بس هستأءن أبو روان الأول لايكون عنده شغل ويتعطل .